Kalijai Re Sandhya Poem Lyrics, kalijai re sandhya poem pdf, kalijai re sandhya odia poem, kalijai re sandhya poem writer, kalijai re sandhya mp3 song download, kalijai re sandhya odia. kali jai re sandhya odia poem lyrics, kalijai poem in odia, kalijai re sandhya kata dhari dhire nauri, kalijai gita.
Kalijai Re Sandhya Poem Lyrics
କାତ ଧରି ଧୀରେ ନାଉରି
ନାଆ ଦେଇଛି ମେଲି,
ଉତ୍ତରା ପବନ ଆଗକୁ
ଦିଏ ତଲେଇ ଠେଲି ||
ନାଚି ନାଚି ଖେଳେ ତରଣୀ
ନାଚେ ଶତ ତରଙ୍ଗ,
ଉଡି ଆସି ଜଳେ ଭାସନ୍ତି
କାହିଁ କେତେ ବିହଙ୍ଗ ।||
ହଂସ ହଂସରାଳୀ ଖେଳନ୍ତି
ଢେଉ ଦୋଳିରେ ଖେଳ,
ଆସିଲାଣି ଖରା ମଉଳି
ଛାଇ ଲେଉଟା ବେଳ ।||
ମାଛରଙ୍କା ପକ୍ଷୀ ଉଡଇ
ଡେଣା ଝାଡ଼ି ଆକାଶେ,
ଲକ୍ଷ୍ୟ ରଖି ଜଳେ ବୁଡଇ
ମୀନ ଧରିବା ଆଶେ ।||
ଚାହୁଁ ଚାହୁଁ ଯାଇ ଗଭୀର
ଜଳେ ପଡିଲା ନାଆ,
ଅକାତ ପାଣି ସେ ଗଣ୍ଡରେ
କାଳିଜାଇ ତା ନାଆଁ ।
କାତ ରଖି ନାବେ ନାଉରି
ନେଲା ଆହୁଲା କରେ,
ମା କାଳିଜାଇ ସୁମରି
ମଙ୍ଗ ସଳଖି ଧରେ ।
ନୀଳ ଊର୍ମିମାଳା ଉଠଇ
ବହେ ପବନ ଖର,
ଛିଟିକି ପଡଇ ନାଆରେ
ପାଣି ଥରକୁ ଥର ।
ନାଆ ପାଶେ ଖେଳେ ମଗର
ବୁଡି ଛଟକି ଉଠେ,
ଖେଳେ ଶିଶୁମାର ଶାଙ୍କୁଚ
ପୁଣି ଲାଙ୍ଗୁଡ଼ ପିଟେ ।
ପାରି ହୋଇ ଗଣ୍ଡ ବିଷମ
ନାଆ ଲାଗିଲା କୂଳେ,
ସୁଷମା ନିରେଖି ଉଠିଲା
ଶ୍ୟାମ ଶଇଳ ଚୁଳେ ।
ବୁଡି ଯାଉଥିଲେ ସବିତା
ଦୂର ଭାଲେରି ଶିଖେ,
ଉଡି ଆସୁଥିଲେ ବିହଙ୍ଗ
ସୁଖେ ଜଟିଆ ମୁଖେ ।
ଅସ୍ତଗାମୀ ରବି କିରଣ
ପଡି ଚିଲିକା ଜଳେ,
ଦିଶଇ ପ୍ରବାଳ ବାରଣ
ଶୋଭା ବଚନ ବଳେ ।
ଚଢେଇଗୁହାର ଶିଖକୁ
ଚାହିଁ ଉଡଇ ଏରା,
ଲୋହିତ ଧବଳ ପକ୍ଷରେ
କେଡେ ଦିଶଇ ତୋରା ।
ଭାଲେରୀ ପାହାଡ଼ ଉହାଡେ
ଲୁଚି ଗଲେଣି ରବି,
ପଶ୍ଚିମ ଆକାଶେ ଝଟକେ
ପୀତ ଲୋହିତ ଛବି ।
ଦିଶେ ପାରିକୁଦ ମାଲୁଦ
ଦୂରୁ ଛାୟା ପରାୟେ,
ସନ୍ଧ୍ୟାତାରା ନଭେ ହିରନ
ସମ କି ଶୋଭା ପାଏ ।
ଦେଖୁଛି ଚିଲିକା ସପନେ
ତୋର ଅତୀତ ଶିରୀ,
ମୁହାଣୁ ତୋହର ବୋଇତ
ଯେବେ ଥିବ ବାହାରି ।
ସିନ୍ଧୁ ପାରେ ଯାଇ ଓଡ଼ିଆ
ପୁଏ କରି ବେପାର,
ଆଣୁଥିଲେ ବୋହି ଦେଶକୁ
ଧନରତ୍ନ ଅପାର ।
ଆଜି ଏ ମୁହାଣ ପାଶେ କି
ଗଢା ହେବ ବନ୍ଦର,
ବିପଣି ମାଳାରେ ବିଜନ
ବେଳା ହେବ ମୁଖର ।
ତୋ ଜଳେ ଶରତେ ଭାସନ୍ତି
କେତେ ମରାଳ ପନ୍ତି,
ଭାସିବେ କି ସିନ୍ଧୁ ସଲିଳେ
ତୋର ପୋତ ପଙ୍କାତି ।
ବିଦେଶ ବେପାରୀ ଆଣିବେ
ଦେଶେ ନାନା ବିଭବ,
ଫେରିବ କି ଶୋଭାମୟୀ ଗୋ
ତୋର ଲୁପ୍ତ ଗୌରବ ।
